【照片時空．上】隨馮漢紀搭上時光機 回到60年代沙龍起飛時
80歲了，過去大半生都以攝影為伴，馮漢紀用相片作回顧，在藝術中心舉辦《時／空：暫如照片》展覽，展出由1980年至今，近40年來的攝影作品。親歷了香港攝影多年來的起跌轉變，又在理工、浸會、港大專業進修學院等多間院校教授攝影，聽馮漢紀將自己故事娓娓道來，就像一部口述香港攝影史。
攝影：馮漢紀（受訪者提供）
撰文：蘇煒然
訪問下集：【照片時空．下】攝影真實亦虛幻 馮漢紀：我不為了紀實而拍
差一點就是馮醫生
馮漢紀年少時到台灣讀醫，然而讀到一半，家裏狀況令他要中途輟學返港。在香港打工，工餘興趣就是拍照。那時候60年代，正是沙龍攝影起飛的時期，攝影發燒友渴求「打龍」技巧，尋求師父敎授；馮漢紀當時並沒有任何的攝影知識，經人介紹，向攝影家潘日波求教。「其實只係學咗3到4個月，都唔算好正式咁學。但有時候佢地有外影，咪跟住去影相偷師，學下人地係咁樣做法」。
後來馮漢紀與一個影友熟絡，又知道拍攝可以成為工作賺錢，於是就伙拍一起接單拍攝。初期最多是活動拍攝、婚宴之類，「婚宴有個好處就係我工餘可以去影，夜晚呀嘛。我地邊個得閒，咪邊個去」。60年代尾，在攝影生意以外，馮漢紀亦開始接觸畫意攝影，同時參加沙龍比賽。
渴求攝影知識
但幾年過去，馮漢紀發現了沙龍拍攝有其局限：「佢（比賽、考銜）採取評判制度，搵啲知名人士嚟做，咁評判嘅喜好，或者世界上沙龍嘅趨勢，係直接影響作品入唔入到選、攞唔攞到獎。所以就出現咗好多套路形式，跳唔出個幾個板斧，都係畫面上做功夫。就覺得咁樣好冇癮姐！」馮漢紀更說笑道：「我果時做緊商業攝影，幫人影相、搞下黑房，曬相放大。咁放相之中有好多沙龍相，睇下睇下，又諗其實我可以開間公司，專門幫人打龍！你要咩相，我就俾咩相你，包入選！唔入選唔收錢！」
於是馮漢紀開始尋求攝影的另一面，同一時間，馮漢紀進入理工學院任教，需要大量書籍和資料去充實自己，於是進入了「啃書」時期。「果陣時最多攝影書、外國攝影書係Swinton（辰衝），但係好貴，佢係一蚊美金計十蚊港紙咁去定價，果陣時美金好似6算左右之嘛，好肉赤！」透過攝影書，馮漢紀了解到原來在外國的攝影潮流是紀實攝影：「我最深刻係《LIFE》生活雜誌，佢裏面好多著名攝影師，而且佢拍攝形式係故事性嘅Photostory。」此外，對中國的情意結亦使馮漢紀特別留意一些拍攝過中國的知名攝影師，如Henri Cartier-Bresson（布列松）、Marc Riboud（呂布）、Eliot Porter（波特）等。
在沙龍攝影獨大的年代，大眾將「攝影藝術」跟「沙龍攝影」畫上了等號。但這顯然不是攝影的全貌，馮漢紀和當時幾位海外留學回來的攝影師見到，香港缺少了沙龍以外的攝影知識，於是在1981年正式開辦了「攝影中心」，就是想將更多的資訊帶給香港，「攝影唔係淨係咁架，仲有好多個可能性；仲有好多個方式，好多個方法影到相」。
展覽作品圖輯：【攝影展覽】《時／空：暫如照片》馮漢紀80載攝影人生
赴美留學
馮漢紀為了教書不停地充實自己，但「啃書」學到的知識是有限的。在香港找到的書籍大部分是工具書、個人影集，又或者跟中國大陸有關，華人市場感興趣的書就會入貨；較為高深、特別的書就顯得數量稀少。「唔可以單靠啃呢啲草去餵飽自己。仲有一個原因，我係台灣係未讀完，中途輟學返嚟。所以我係好想好想讀完呢個階段嘅書，於是一路搵機會去讀書」。那時候理工有資助計劃鼓勵教職員進修，在進入理工8年，即1983年，馮漢紀終於等到一個機會。
終於跟學系談好放假的安排，馮漢紀去會見審批資肋的部門主管：「佢話『拿，我地依家個預算就淨返好少架姐，做唔到Full Sponsorship，只可以俾有薪假期、同埋一張來回機票，你制唔制？』咁我計一計，自己要俾學費同埋係外國嘅生活洗費。當年學費唔平架，7,200美金一年，一年生活洗費又差唔多，咁影相又要買菲林、沖洗、放大之類材料果啲費用呢。慳慳地都要萬五、萬六美金先夠一年，即係十萬港紙；我讀兩年，就要廿幾萬。」雖然肉赤，但若果不把握這個機會，未來不知道會否還有機會，馮漢紀終於咬實牙根，處理好學系的事情之後，在1985年進入芝加哥藝術學院，修讀藝術碩士。而那個年代，大家在討論Garry Winogrand逝世、在爭拗Robert Mapplethorpe的相片，是攝影廣受關注的年代。
「美國學啲乜？唔記得」
那時候馮漢紀在港教攝影，教的是平面設計裏面的一個選修科目，是設計廣告、包裝過程中的一個應用技巧，也是馮漢紀的商業攝影專長。不過到了芝加哥，學科以視覺藝術一門看待攝影，加上是碩士課程，求學的模式全不一樣。「除咗Art History同Criticism之外冇堂上架啦！」馮漢紀續道：「你自己想點影就點影，影完搵教授做你adviser，一個禮拜、兩個禮拜傾一個鐘。計起上嚟，呢個鐘幾貴呀！學生係門口等，爭住做Tutorial，講多咗兩分鐘已經入嚟嘈你啦！」
「我都唔記得學咗乜嘢。教到你知道係『嘢』，果啲就唔係『嘢』嚟！」聽得記者一頭霧水，這豈不是苦等而來的進修機會白白浪費了嗎？馮漢紀解釋：「教授唔淨係攝影專長，仲可以Video、Sculpture、Painting、Printmaking。佢講咗一輪，你好似知道，又好似唔知，咁樣狀況。但係到後期啲養料就慢慢上返嚟」。能夠直接灌進腦袋的，大概都不是高深的學問；真正的求學，是施肥，需要一個吸收、發芽的過程，最後才會結果。拿起枱上叉子，馮漢紀說：「去芝加哥唔係要學點影呢支叉，點樣放之類。而係果陣氛圍、果種思維方式。」
黃啟裕回憶求學時期，自嘲是「佛系學生」，對寶貴的Tutorial愛理不理。不過其實真正的師生交流是發生在「呼吸」的時間，教授與學生一起吞雲吐霧，吞了知識，吐出墨水。（蘇煒然攝）
香港的攝影系
在芝加哥回來以後，馮漢紀教書的方向出現了變化。「但個變化使到啲學生更加𢯎頭囉」，前文講過那時候教攝影是作為一門應用科目、應用藝術，但馮漢紀認為攝影應該是一個獨立的媒體，而非設計廣告、時裝時候的一門技能工具。後來1991年開辦的理工攝影學士課程（下稱攝影系），亦是基於這樣而設計，可惜到2000年馮漢紀退休，攝影學士課程亦拉閘關門。
「好多原因：大家對影像啲認知方面出了拗撬、中英會談令大家人心惶惶、數碼（攝影）又未成形，好多嘢夾埋」90年代中至到90年代尾，香港攝影沉寂一段頗長的時間。「十年（對攝影系的發展）真係唔夠，十年我覺得只係一個起步嚟。到後期課程裏面有好多嘢想改，想更新，接近2000年嘅時候就更加。但係冇辦法，夠鐘打洋，要拉閘啦。」
數碼攝影普及，網絡世界發表作品方便，使攝影的「人口」急增，攝影教育好像又豐富起來。「未來嘅攝影課程應該要大裝修，Revamp。點樣將傳統同新嘅嘢、Analog同Digital融合呢？係一個難題嚟架。直接由數碼開始得唔得呢？我發覺其實唔得架。因為你冇一個最基礎嘅，攝影特性嘅知識知訊，跳落去數碼果到，咪好似個人空咗囉，果段時期（的知識）真空咗。」
沒有留言:
張貼留言