綠葉王高俊文入行40年，13年離開無綫轉投港視，原以為有機會發圍，可惜港視不獲發牌，令他鬥心盡失。不想吃回頭草的高俊文，只靠少量工作過活，自言「吊住條命唔使死」，之後又投資失利，一度陷經濟危機。幸得女友一句「咁樣唔得喎」點醒，高俊文轉行做保安自力更生，不再發明星夢。
撰文︰唐琛悠
相關新聞：【拍90劇集】為賠償與無綫對簿公堂
現年60歲的高俊文78年參加無綫藝員訓練班入行，拍攝過多部電視劇，王維基12年開始籌備港視，高薪向無綫挖角，高俊文也是其中一個過檔藝員，他原以為可以有一番作為，可惜港視不獲發牌，他也不想返回無綫，工作量頓時大減。高俊文日前接受《蘋果》電話訪問，他坦言那時工作甚少，收入僅夠餬口：「嗰段時間好少工作，得番配音同有啲戲做吓，不過唔多，叫做吊住條命唔使死，但係慢慢覺得好頹，連女朋友都話『咁樣唔得喎』，冇晒鬥心，之後經濟有啲問題，加上投資失誤，慢慢諗咁樣唔掂，真係會死，要搵番份正職，唔好再發明星夢。」
「個心好掙扎」
明星夢碎，高俊文離開從事多年的演藝圈轉行做保安，內心也經過不少掙扎：「呢個決定諗咗非常之耐，我報讀嗰個高級保安課程之後，個心都係十五十六，唔知點樣去面對自己，個心好掙扎，不過都OK，原來做保安都要攞牌，要上156個鐘頭嘅堂，對我嚟講有啲辛苦，但最後都讀咗兩個月，考試pass咗，係一級認可資格。」
相關新聞：【自力更生】反璞歸真貼地打工
課程畢業後，高俊文在連鎖超市工作，他覺得甚具挑戰性，因為要面對他人目光，商場每天人來人往，不少人都認出他，但高俊文對自己說，要從高難度的地方開始，幸好最後克服過來。「可能我係一個演員，慣咗面對群眾，一路試工都冇問題，做得幾好。點知有你哋行家又過嚟搵我，話有人報料嚟了解吓，嗰陣有啲𤷪𤺧，心情又忐忑，覺得我只係想平靜嘅生活，點解仲要滋擾我？你知啦！做演員嘅心態好矛盾、複雜，好彩我樂觀諗通咗，我要多謝呢個讀者，令到全行都知道我轉工。」
仲做得靠自己
適應是第一步，高俊文昔日的藝人身份，對他有利也有弊：「你問我係好定唔好，我都唔知，可能幫到我喺事業有啲進展，亦可能因為太惹火，有公司而唔敢請我，我平常心喇。」不過被踢爆轉行後，高俊文心情反而變得輕鬆：「公司啲人都對我好好，你知我都年紀唔細，如果再向社會踏足，又能夠做到啲乜嘢工作。可能有啲人見到你咁，畀啲嘢你做，做到退休，都無謂嘥彈藥。𠵱家咁樣仲好，唔需要再尷尷尬尬，自己可以面對，我都希望畀到正面訊息大家，既然行得走得，點解唔靠自己？我仲做得嘢，腳踏實地搵份工，希望提升自己，由散仔做起，慢慢升做組長、主管，過咗70歲就會轉做看更，到時就退休。」
轟議員唔做嘢
雖然已轉行，但對於演藝工作，高俊文卻不會抹殺任何可能：「如果有人搵我，我都會老實同人講，我做緊保安，返夜班，如果認為我啱就直接開工，唔好casting，始終要夾一夾時間，要休息先可以做。」他也有感而發：「我唔係因為唔再喺呢一行而語無倫次，之前又話中港一家親，但係又有演員限制，其實係抹殺演員嘅機會，尤其嗰啲冇乜知名度嘅演員，但係我又睇唔到嗰啲代表業界嘅議員做緊乜嘢，我睇見啲人鬧啲劇集好膠，其實都幾傷感！」
沒有留言:
張貼留言