童年悲慘 老公患癌 自揭陰暗面
胡美儀研究心理學釋懷
70年代出道的歌影視紅星胡美儀，在鏡頭前演盡人生悲歡離合，但原來在鎂光燈的背後，她的人生亦歷盡起伏跌宕。早前胡美儀接受《蘋果》專訪，自揭被家人離棄，在寄人籬下中度過童年。拼搏大半生，遇到同行知音毛俊輝，但當二人準備步入教堂卻發現未婚夫患癌。共同抗癌的日子過後，胡美儀卻依舊不快樂，直至攻讀心理輔導後，她才明白助人自助的道理，更學會了釋懷。
撰文︰祖李
攝影：陳俊強
跟胡美儀做專訪，原以為話題離不開演戲、唱歌、粵劇做生意，畢竟77年入行的她，無論歌影視粵劇都有她的身影，甚至94年暫別娛圈，做過美容公司的高級行政管理人員。但原來，胡美儀講得最多的，竟然是她花了五年時間、今年六月修畢的心理輔導學學士課程，她雀躍地說︰「我揀心理學，係因為我曾經俾人輔導過，令我搵番快樂。五、六年前我出書《快樂與我共舞》，就係剖白自己內心黑暗面。揭晒啲衰嘢出嚟咪好囉！呢張係藥單嚟。」
遭父母離棄
胡美儀表示在學習心理輔導的過程中，學懂明白自己，從而令她了解別人：「其實好多嘢簡唔簡單都係睇自己，電視台都可以好簡單，你一拍完嘢就走都可以，但如果你內心有問題，就算去到邊個群體你都係唔舒服。學習心理學令我明白自己點解會唔開心、點解會麻木。𠵱家同人溝通，我明白原來對方憤怒當中係有恐懼，原來對方係因為恐懼失控，用憤怒嚟表達，睇嘢會睇得深好多。」
別以為胡美儀現在總是笑口常開，她坦言從前負能量滿瀉，對人失去信心，她更坦言從前不懂與人溝通，直至五、六年前，她接觸心理輔導，才找到開啟自己心靈的鑰匙，學會面對內心的陰暗面。她說：「我出世三個月就俾親生父母放低咗，被送去唔同屋企長大，呢啲缺失好影響我對人嘅信任，或者冇安全感，呢啲我全部都經歷過，如果成長有缺失嘅人同我傾偈，我會好明白佢哋嘅情況同感受。例如婚姻啦！我第一段婚姻係離異收場，之後再有仔女、孫仔，都好影響佢哋成長。」胡美儀自言以往不愉快的經歷，令她多了一份同理心，更易明白別人感受，「不幸」反而是她的優勢。
胡美儀的「不幸」，又豈只是她的童年。當年與香港話劇團藝術總監毛俊輝結婚，亦令她嘗盡「苦頭」。02年胡美儀與毛俊輝到談婚論嫁時，未婚夫卻確診患上胃癌。當時胡美儀內心掙扎，但最後她都選擇如期結婚，陪丈夫一起抗癌，輾轉16年，胡美儀說每天都當丈夫患重病，因為這是夫婦感情最好的保鮮方法。她說︰「多謝老公十幾年前嘅癌症，因為佢唔知有冇命，做化療都話得三成把握，後來佢好番，我就覺得我哋係『沒有明天的婚姻』，所以𠵱家永遠都十指緊扣，十指間中唔可以有石仔『銀』住，咁就過咗十幾年，好多時身體語言勝過千言萬語，我哋用行動去證明愛。」
胡美儀說丈夫患病期間，身邊朋友仍難以察覺她的情緒起落，「嗰陣時我依然如常工作，我嘅一貫作風，係唔開心嘅嘢會冚住先，先面對工作。對一個從小就識搵出路嘅人嚟講，我表面控制情緒嘅能力好強。」胡美儀續道：「你諗吓，我四歲已經揸住個鎚仔揼瓜子，又要踎喺街邊摘芽菜，因為我明白摘完芽菜之後就可以有粒波子糖。乜苦我都試過，加上嗰陣因為有信仰，我同丈夫都係基督徒，嗰陣主帶我哋走過深谷。」
睇戲做橋樑
其實，77年參加《聲寶片場》獲總決賽冠軍出道的胡美儀，80年代時演過不少電視劇，其後92年演第一齣舞台劇《一籠風月》就獲香港戲劇協會頒發的「最佳女主角」，不過最令她感動的成就，竟然是12年獲得「傑出女性大獎」。胡美儀說：「試過人哋問我，點解婦聯要頒呢個獎畀我，我突然唔識答。不過我腦裏彈出咗一句︰『可能係因為我愛我丈夫啦。』乜愛丈夫都會得獎？哈哈哈……可能除咗唱歌事業以外，人哋睇到我另一面，點樣同丈夫相處，因為𠵱家婚姻、家庭好易出問題。」
胡美儀說舞台劇是她與丈夫的溝通橋樑，兩人因為舞台劇相識、相知到相愛，現在兩人也是一面吃早餐一面談戲劇。但與丈夫不可能沒半點拗撬吧？她胸有成竹地說︰「冇㗎！我哋會公還公私還私。佢做導演，我做演員，譬如做完個劇返屋企前，我會問佢︰『我哋仲有冇公事要傾？如果有，就去啡咖店飲杯嘢傾埋先。』傾完返屋企，咁就唔會將公事混埋私人感情，變成爭拗點。」
胡美儀坦言除了舞台劇，睇商業片都是夫妻的減壓良方，她說：「我同佢嘅生活情趣係睇戲，睇完你講吓我又講吓，我覺得好有趣味。最近忙，我哋會揀啲唔好咁深咁用腦嘅戲嚟睇，最好就係大家relex笑一場。又或者《職業特工隊》呢種，劇情好鬼緊張，個注意力去晒電影度，咁咪可以減壓囉。」
出書訴心聲
難怪胡美儀與毛俊輝近年出席各大小場合都形影不離，今年62歲的胡美儀還有一個心願，就是將她之前用作自我反省的功課輯錄成書，希望能幫助心理有障礙的人。她說：「其實人心裏一直都是光的，只是我沒有按掣，只要你按，全屋都係燈火通明。如果你想擁有快樂，只要你肯，就可以擁有。」從事演藝事業大半生，胡美儀從心理學找到人生另一條出路，原來為他人付出，就是她對自我價值的肯定。
沒有留言:
張貼留言