說穿了，我們都是梁齊昕

首先，要多謝梁家「異見人士」梁齊昕，喺佢身上，充份體現言論自由可貴之處。如果佢選擇屈服於強權，香港人永遠唔知道，呢位小妮子一直都受咁大壓力。

特首話，「齊昕嘅健康係有一啲問題」。咁啱內地唔少「上訪」嘅人，都會「被精神病」。你嘈嘈閉呀吖嗱？困你去精神病院。特首辦事，果然符合國情。
話分兩頭，齊昕噚日喺fb發出多個言論，仲話要離家出走。唔少網民都戥佢陰功豬。千頌C好肯定，呢個moment，齊昕民望一定高過CY十萬倍！事出必有因，你試吓將佢出嘅post細味多次，對港人來講，簡直係心聲！反之，對CY來講，就係夭心夭肺，難怪激到佢屋企人嬲到唔畀齊昕出街（CY話冇禁錮，所以我唔會用禁錮呢個字眼）。
佢話「I'd rather be living on benefits, sleeping on a coach, eating cup noodles everyday than living the life I'm living right now.」講真，如果唔係因為「尊嚴」呢兩個字，相信唔少有手有腳有氣有力嘅香港人，都有諗過食綜緩算數。留意番，最新份預算案，綜援係出「三糧」！
但普通打工仔，望一望糧單，欷歔，再望一望樓價，真係連諗吓「置業」都覺得自己戇居。所以佢話「If I were on the20th floor of a building instead of being in禮賓府」，呢句個「if I were」字用得妙，用得準！唔少打工仔，於按揭及供樓入息比率要求收緊後，面對上車上到二十樓，都只可以用呢種條件句，於英文文法上，表示不可能！ 

刺中香港人死穴

所以佢講到「sleeping on a coach」，即係流動住所呢個概念，其實極具前瞻性，事關泊車錢應該點都平過住宅租金！唯一要諗嘅係，當蘇錦樑話「流動美食車」唔可以流動經營，我唔知政府會唔會有條例話「流動住所」唔可以流動住。
至於齊昕BB講到捱杯麵，唉呀，又中香港人死穴，要上車真係要咁慳家的！不過家陣食杯麵算係高消費啦。最近有單新聞，話個護士為上車，Lunch食兩塊麵包都嫌貴，最後食一塊就算。
睇埋齊昕BB講「I'm leaving home」，但最後都係被迫留喺屋企，作為香港人，我真係感同身受到眼水都咇埋出嚟。自從你老竇上台之後，身邊唔少朋友，已經開始諗離開我哋嘅家，即係香港，但好可惜，外國居留權你估咁易拎咩，續拎番本BNO已經覺得自己巧威威，最後咪又係因為要搵食，被迫留喺屋企。
所以佢話，「It's BS（bullshit） when people say there's always a way out。」本人真係好想畀個hug你，你老竇經常都話要改善青年人出路，最後逼到後生仔走去瞓馬路。齊昕BB，你用「廢噏」呢個字，真係講中晒香港人心聲！太精采了！
你說你面對瘋狂的家，我說香港人面對瘋狂的世界，說穿了，我們都是梁齊昕。齊昕，衷心的向你說聲：加油！

千頌C
http://fb.com/winbigwok
本欄逢周三刊登