末日博士倒數8年羅家聰談「被離職」遠因
上一代香港人引以為傲、以搵錢為上的「中環價值」，過去半年被顛覆。70後的銀行佬羅家聰，應該很有感受。
10月，羅家聰「被離職」交通銀行首席經濟及策略師，有近因，原來也有遠因。
他說，2011年左右，中國經濟轉差，人稱「末日博士」的羅家聰睇淡，「那時，公司就叫我唔好再講中國經濟。」
「到了近期，就叫我唔好講香港經濟。」連香港經濟都無得講，即係乜都唔使做。羅說，離開交行前夕過著返工等放工的日子，「與其係咁，咪叫你返屋企。最後好和平呀，我冇同佢拗，好簡單，你叫我走咪走囉。」
「近日的事是觸發點，遠因其實已經好耐。幾年間，做嘢空間不斷收窄，縮下縮下無得走、無得行、企都無得企，那就跳出來。」
「一路唔出聲、溫水煮蛙？係，我係輻射緊好多香港人。」
羅家聰是財經界KOL經常開咪出鏡，有名氣也有粉絲，喜歡他的人覺得他夠串嘴又直接，這種性格當然也易招敵人。年僅42歲的他有四個學位：港大政治與行政學系學士、港大經濟碩士、中大數學碩士、城大經濟博士。他做過一年政府合約經濟師、政府統計處短期統計師，2005年加入交通銀行，由財資分析員做到首席經濟及策略師。
羅家聰是個典型中環金融佬，「由六四到而家我都無上街。」點解？「我有咁多地盤，我有支筆就得啦，點解要上街熱辣辣呀，使乜出去俾人拉呀。大部分香港人以前都政治冷感啦，由八八直選開始，唔係真選，選了的人也不代表你；還有行政主導，行政長官不是政黨制、不是選出來。大家一路以來習慣無得選，上面不讓你去選，而香港人都係經濟動物。」
金融人，講到尾，目標非常明確：發財。
交通銀行是中國五大國有銀行之一（另外四間是：中國工商銀行、中國農業銀行、中國銀行、中國建設銀行）。在交行任職14年，羅家聰做到變成銀行在港的生招牌，「我係好低級員工，但我吸到客，有sales同我講，搞講座我來與不來，可以有幾百人分別。」
點解變成大陸管理層眼中釘？「起點是中國經濟轉差，大約2011、12年。（你唱淡佢唔中意？）是，之後叫你唔好講（開聲講到明叫你唔好再評論中國經濟？）係，好清楚。佢先發制人，畫了好多圈你唔可以踩埋去。」（註：2010年中國GDP增長為10.6%，到2011年跌至9.6%，2012年再降至7.9%。之後幾年一直下跌。）
「以前有好少少藉口，例如話有個團隊專研究大陸，我沒理由講埋佢嗰份，當時也可能有辦公室政治，上面見你講埋，唔係好鍾意，於是搵人叫你唔好講，這個是我推測、有可能的。」
2014年佔中又如何？「進一步更多範圍叫你唔好touch，佔中唔好講、佔中點影響經濟和金融市場唔好講。到了近年中美貿易戰開打，都唔好講。其實路數都一樣。」
過去半年反送中又如何？「都係話唔好講，我臨走前，話所有訪問都唔好做，平日開咪寫文講經濟可以，但ad hoc就唔可以做。」是幾時的事？「exactly唔記得，（運動）初初冇，是中後期左右。叫我唔好講、唔好寫已經夠啦，我返工係做呢啲。」
「我冇得反擊，當然可以同佢拗，但普遍中資文化，間間都係人治，閂埋門佢鍾意點就點，即刻炒你都得，唔需要同你講咁多，拗的話係搵嚟拗。」
羅家聰最後是收到大信封？「唔係佢俾信我，佢要我自己走。佢要我走，我咪走囉。」
羅家聰說，香港金融界的白色恐怖，近年行內人心裏有數，但一路沒人用把口講出來。具體是什麼？「一啲好簡單嘅都講唔到，如中國經濟爆煲有冇錢走、有冇一些大陸資金操控香港，suppose一個國際金融中心應該講得到。經濟是否向好、有冇錢走、這個運動會令經濟好定壞，這些無傷大雅，應該講得啦，但都無人夠膽講。」
「行為上，好多銀行，中資尤其是，如你看淡人民幣，敢唔敢大手沽？唔敢，上有指示，中資要跟，其他都唔敢做，實際上操作係有唔同。成個經濟環境咁差，但你唔會睇到有人大手沽人民幣資產。上面吹雞要你買，間間行認購些，托高出來做到好靚。這是會發生的，未至於好嚴重，但在市場有意無意間接影響，已經都好多年啦。問題係做到有幾過分，而家過分程度係，呢幾個月鍊死晒所有嘢。」
「一個自由市場，沒理由要聽央行指示，這是新興市場才會發生。唔講得唔寫得，唔單止有違市場定律，係有違行業操守。但成行都係咁啦，有一批外資睇錢份上，為客而寫報告，如寫得離譜輸死啲客、唔符合compliance，佢會返轉頭搵你。另一樣是掂到政治位，銀行唔敢踩埋去。」
在中資工作，員工是否都被政治審查？羅家聰說：「佔中時，要你出去撐警遊行，我沒去，我應是少數沒去的人，佢會剔名。（後果？）即時冇，但我唔知而家呢個算唔算係後果。」
投票有冇指定投給誰？「冇，但佢會將商會拉票資料forward出來。」
半年來，中資可有發功？「好似唔覺。今次似乎成個局好被動，建制、藍色在捱打，似乎唔係好叫你撐，只係唔准你去黃色那邊的示威遊行。佢唔會出notice通知，會恐嚇你，有傳言（唔好講邊間，我將好多間中資mix埋一齊講）有人去了被炒魷魚，有的可能成個部門沒bonus出，有的衰到周六日要影相打卡，某個時間要影幅相講自己喺邊度。」
「我入銀行時，大陸人可能只有一、兩成，來做最低級的trainee、junior，當然最高級的都係大陸人啦。現在的比例是大，三分一至一半都係內地人，好多都神神秘秘，邊度嚟又唔知、是否在香港讀書、有何背景又唔知，好古怪。」
既然紅線早已出現，羅家聰為何頂得順？「我一路想走，走唔甩，無人請。」人工高？「cheap到爆，幾多唔好講，總之去第二度一定好過呢度。」
「呢幾年，好多行都唔敢要我呢啲人。」
「我一早係佢眼中釘，我沒一早被炒，我諗我做得嘢呱，唔做得一早炒左啦，咁我吸到客啊。」他的部門有三個人，上司同事都是香港人，大家有傾有講沒問題，「我要走，唔係上面一、兩個人的意思，係再上面壓落嚟。」
「我而家唔係發難、唔係唱衰佢，我只係講緊香港生態。」
「今次運動，香港人感覺殺到埋身。有啲人唔係一直感覺唔到，而係溫水煮蛙，煮到差不多熟了，便藉反修例走出來，反修例是一個契機讓他們發作。」
羅家聰不是不太理政事嗎？「我這兩年花時間讀書，社會發酵一啲嘢，我最初唔多aware，佔中一個、修例我沒想過搞到咁大。搞下搞下先知咁大鑊，你都可以話我後知後覺，我自己初初沒諗咁多嘢。」
最後，他被政治找上門，「被離職」一事他有何反思？「每次有嘢，紅色資本就加速來港：2003年之後的自由行、2014年後金融界換血。今次之後會全方位控制，是一定的，買公司、入股公司，佔大比例佢就可話事。大連鎖集團佢搞掂就得啦，搞掂埋金融界，已經好多錢，唔使理你中小企。」
「中環，係講錢，講錢的話無得同共產黨鬥，佢會一路倒水，愈深愈快，一路被佢displace。但去到一個位，當絕大部分是紅色的錢、紅色的人，鬼佬或會突然有一日醒覺：香港國際金融中心的地位，出現了質變。」
「人哋俾水你吸，因相信你係一個有制度的地方、free market、free flow，如果冇制度、唔free，點解要來。同大陸人講呢啲？佢哋沒反應，佢哋係知，但唔敢俾反應，大家心中有數啦。」
「我個道理好簡單，如果你咁叻，就將上海變國際金融中心囉，我入銀行時已講，講咗十幾廿年。而家搵澳門做，即係搵香港做賭場一樣啦，攞嚟笑。」
羅家聰說，他和朋友傾緊一些合作。他應該大把錢，可會移民？「大把錢，你講啦。」
「我唔排斥中資，而家係中資排斥我。」羅家聰這話，令人想起一句：
你愛國家，國家愛你嗎？
那麼，
你愛國家的錢，國家的錢愛你嗎？
愛，不會無條件的。
