執番條命 也許不易 李健達

執番條命　也許不易　李健達

「喺香港，真係壓力好大，嗰種壓力其實係最傷身體。𠵱家喺泰國生活鬆動好多，至少有個竇，唔使好似喺香港咁慘，七千蚊只能住劏房。」

就算記不起他的名字，但一定記得他主唱的電影《阿郎的故事》經典片尾曲。

他就是上世紀80年代歌手李健達。數年前他因生活及工作壓力，一度患上重病，尋醫多遍卻找不出病因，令他非常困擾。

無望之際，他決定進行天然食療法，把昔日飲食習慣來個大洗牌，又吃一種葉當食療，之後為尋找合適自己體質的氣候地方，離開自己生活了50年的香港，連根拔起，移居泰國，終於執番條命。

1989年李健達主唱《也許不易》，正式成為歌手，一曲成名。

怪病纏身　癌指數升

「2014年大病咗一場，差唔多喺死亡嘅邊緣，我睇咗好多個名醫，我入過急症室都有四次，都搵唔到原因。」自言病情終於穩定下來的李健達，現在比病重時清減了，近日為工作回港數天，自述死過翻生的經歷。

「有日我做完騷，之後成個人飄吓飄吓，平衡唔到，我以為係感冒，諗住冇乜嘢啦，以前都習慣。點知第二日起床嘅時候，我一起身就平衡唔到，我開始好驚。」李健達說。

病發前出現水腫，體重增至200多磅，其實已響起警號，只是繁忙的都市人，總不回應身體發出的呼喊。

起初他被醫生斷症為耳水不平衡，食藥後兩日，血壓突升至160，他再一次走入急症室。「醫生話：『你返去食吓血壓丸啦！我哋畀你最靚、最強嗰種。』食咗兩日，有朝六點幾突然好唔舒服起身，一量度血壓，竟然去到196，食咗藥都去到196，我就好驚，於是又即刻再去急症室。啲護士一見到我個樣就叫我唔好郁，佢拖張床過嚟，佢話好易爆血管，又即時幫我做咗驗身，心肺圖乜都做晒。跟住三個小時後睇報告，佢哋問我：『李生你最近壓力係咪好大？』佢話我嘅癌指數過咗界線，血壓又過晒錶，糖尿症狀出咗嚟，即係有個pre-diabetic，我從來冇嘅，喺我認識之中，呢三樣係好危險嘅嘢。」

服藥半個月，情況依然沒好轉。

「我keep住食西藥嗰兩個星期，血壓都係維持喺160幾，未跌過。我成日喺度懷疑，到底啲藥有冇效？我有宗教信仰，於是跪低祈禱，我話：『上帝我都預備你接我走！』」行不到，睡不着，對一個病人而言如千斤負荷。就在他無助沮喪時，忽然想起，曾有一個學生給他一本關於健康的書。

飲食洗牌　奇蹟好轉

「關於如何從天然飲食治療癌症，即係因應自己體質食啱嘅蔬菜，睇咗之後我就好奇，跟住上網搵所有關於高血壓、糖尿病、癌症嘅資料。我係食緊西藥，但嗰啲西藥真係冇效，兩個星期一啲效果都冇，我就膽粗粗跟呢個天然食療方法。」

選擇自救的他，首先把數十年的飲食習慣大洗牌。

「我丟晒屋企所有可樂、即食麵等等。改食天然食物，我慢慢扶落樓去超級市場買薑、洋葱、蒜頭等等返屋企自己磨，用嚟煮菜。食咗三個星期，人開始精神，不過食嗰啲嘢好辛苦，因為從未咁樣食過，飯都唔食，餐餐都係食番茄、西芹、紅菜頭。我轉食菜、天然食物之後，好明顯三個星期我就精神咗，唔使食藥我都瞓到覺，仲開始行得番。我就開始學識呢樣嘢，相信天然食物療法。」

嘗過疾病的突襲，失去健康的可怕，幾十年提不起勁做運動的李健達，也決心郁動四肢。

「做完運動我嘅血壓係降到117至125，次次都係。」之後遇到一位醫生，對方建議他遷去適合自己體質的他鄉療養。

遷居泰國　痛症消失

「我遇到一個中醫師，佢為我診症後就話：『李生，你嘅身體屬於寒濕，你係咪住海邊？』我話係呀，佢話你唔住得海邊，因為海邊嘅濕氣好重，嚴重啲可以癱㗎！濕氣係咁緊要。於是我問佢，醫生我唔去海邊住，我唔喺香港住，唔去深圳住，咁可以去邊度住？佢話我嘅寒濕一定要搵亞熱帶嘅地方，一定要溫暖，即係四季溫暖。」於是他決定移居泰國。

「飛過去住咗一個月，我發覺冇錯喎，喺暖嘅地方我嘅身體真係好舒服囉！又唔會起身起唔到，腰骨好痛嗰啲全部都冇晒。」

移居當地，還給他無意中發現，有一種葉，成為他血壓救星。

「我去到泰國，無啦啦行到一間有機店，我見個包裝幾得意，成份寫moringa，我唔識moringa係咩嘢，但我又好奇，所以買咗樽返屋企試吓。跟住我就上網睇吓係咩嘢，原來叫神奇的樹，呢啲葉原來可以醫病嘅，係對高血壓有幫助。我唔做運動嘅時候，我嘅血壓都仲係升，咁我咪食囉，於是食咗嗰隻神奇的樹moringa，中文好似叫辣木籽，印度、泰國、東南亞好多地方都有。食咗之後，兩個月後我嘅血壓真係好穩定。」不過，進行任何天然食療，安全起見，還是先向有關專業人士或醫生詢問意見。

重拾健康這一仗，對李健達而言真的「也許不易」，故今天他非常注意飲食，吃新鮮及有機蔬菜為主，加上移居到生活指數不太高的泰國，經濟少一分壓力，在各方面的改善，終於回復生猛。

遷居泰國，少了生活壓迫感，李健達身體健康大大改善。

曼谷一日使25元　香港壓力最傷身

去年決心連根拔起，離開土生土長的香港，以退休人士申請在泰國定居的李健達，在曼谷市區租一個七百呎的竇，只是三萬泰銖（約港幣七千多元）。他坦言從事音樂工作，賺的是有限錢，故昔日在香港屋租動輒過萬元，生活令他感到有份無形的壓力。

「其實臨離開香港前，生活已經慳咗好多，但始終你嘅收入萎縮緊，就一定要諗辦法平衡開支。當時我慳到100元一日，唔難嘅。有時今日食多咗錢，聽日縮食番囉。但喺香港，真係壓力好大，嗰種壓力其實係最傷身體。𠵱家喺泰國生活鬆動好多，呢度一餐大約係港幣十元，平均十元有三餸一飯，𠵱家我使100泰銖一日啫，即約港紙25蚊左右。至少有個竇，唔使好似喺香港咁慘，七千蚊只能住劏房。至於工作，我做音樂冇影響，唔需要轉行。」李健達說。

文化差異，他說只要有一個包容的心，接受當地人節奏不如香港般快，就不成問題。至於有否想過，未來的另一半是泰國人，組織家庭？李健達說：「我都半百，呢啲隨緣啦！」

阿郎的故事

《勁歌》導演出身 　唱電影插曲成名

外界認識的李健達，是電影《阿郎的故事》的片尾曲主唱者，但其實他揸咪搵食之前，是無綫《勁歌金曲》的導演，因識玩音樂，被當時的新藝寶唱片公司賞識，邀他試音，不過最後敗給另一新人。

「新藝寶最後冇揀我，因為佢哋要捧一隊叫Beyond嘅組合，輸畀佢哋我心服口服。」

直至1989年，有機會主唱《也許不易》，正式成為歌手。他說當日錄此曲成本有限，不可能蹉跎金錢與時間。機會得來不易，故踏入錄音室前，練唱工夫必須準備十足，最後一take過錄好《也許不易》，一曲彈起。