【一代才女腦退化？】自揭74歲白姐姐記性差咗 謝偉俊：希望佢身體健康
才女白韻琹和議員謝偉俊（Paul）相識30年，兩人共同經歷了幾許風雨，其間白姐姐曾因逃稅坐監、Paul曾被罰停律師牌1年，早前甚至傳聞白姐姐有腦退化！
日前《蘋果》相約兩人做專訪，到訪他們位於西半山的豪宅，行動緩慢的白姐姐帶記者參觀全屋，訪問期間跟老公互笑互窒，原來，30年來兩人從沒跟對方說過「我愛你」，現60歲的阿Paul只願74歲的白姐姐身體健康。
訪問內容如下：
記：婚姻有冇出現過危機？有冇試過嗌離婚？
謝：嗌人離婚就嗌得多，我哋自己好似冇。
白：你話幾衰呢，自己唔離叫人離，證明嗰啲都係順口噏。
記：如果有一日，Paul身邊出現狐狸精話同佢生仔，白姐姐會點做？
白：咁咪由佢，家家有求，但未必有人吼我，賣剩蔗嗰時都冇所謂，揀個蔗頭蔗尾囉！我惟有自己咁諗，做人冇話永遠會贏，輸咗自己安慰自己。
記：如果白姐姐有一日老到行唔到，阿Paul會點做？
謝：佢而家行都有啲困難，話時話，佢膝頭哥呢，最近我哋去不丹，佢行都好辛苦，佢而家經常膝頭哥痛唔行得太遠，令到我哋少咗好多樂趣，因為我哋幾喜歡去旅行，但旅行好多時都要行，所以而家少咗，佢行得少咗又肥仔咗。
白：唔係肥好多啫，你哋係咪覺得我肥咗？普通size啫。
謝：去到而家階段，我哋經歷唔少考驗，未來比較難有因素令到我哋會分開，當然生老病死冇得講，我覺得我哋有足夠成熟同經驗應付挑戰，我覺得心理準備係有嘅，但再大啲嗰時，梗係加枴杖。
記：你會做白姐姐嘅枴杖？
謝：唔單止枴杖，我抬佢都抬過好多次，成個抱起佢，（白：行山坡斜到乜咁，跣落去點算。）你知而家你重咗好多，好難抱，扚起你都辛苦，成隻大笨象咁。
記：傳白姐姐有腦退化，擔唔擔心？
謝：佢反應完全冇事，不過記性差咗係真嘅，我諗每個人出世都退化緊。
白：因為有啲嘢唔想記，佢哋傳嗰啲嘢都唔係開心嘅，何必去記呢。
謝：記性差咗呢個係事實，冇所謂，社會上都普遍，最緊要我哋溝通上完全冇問題，同朋友相處仲係反應咁快，快到鬧人唔使本，哈哈哈！
記：有冇鬧Paul？
白：我唔捨得。
謝：事實上鬧係少咗，而家笑聲多咗、happy咗，佢而家個人冇咁忟，祥和咗。
白：唔係，我覺得我個人係數十年如一日，我刁蠻啫，唔係忟。
謝：恃靚行兇嗰隻，而家年紀大咗冇咁刁蠻。
記：同對方講一句說話，想講乜？
謝：身體健康！呢個真心，我希望佢注重多啲，因為有時叫佢食又唔肯食，叫佢做運動又唔肯做，佢始終大我啲，最好肯操多啲，我諗咁會好啲。
白：我覺得阿Paul屬於100分，我好彩識到佢，其實冇乜遺憾。
記：對上一次講「我愛你」係幾時？
白：幾十年都唔會講呢啲，好肉麻。一個眼神、笑容已經係，講到出面畫蛇添足。
謝：好似從來冇講過，中國人唔興講呢啲，有時字裏行間會感覺到。
記：愛情依然存在？
白：睇吓乜嘢愛情，細水長流，互相關心就有，但絕對唔會好似初戀咁激情。
謝：幾十歲，成30年，有時間就一齊已經好夠，其他唔需要多講。
沒有留言:
張貼留言